மானூர்

திருத்தல அமைவிடம் : இந்தியாவின் தமிழ்நாடு மாநிலத்தின் திண்டுக்கல் மாவட்டத்தின் தொப்பம்பட்டி வட்டத்தில் மானூர் எனும் ஊரில்  அமைந்துள்ளது.

தல சிறப்புகள் :  லிங்கத்தின் அம்பு பட்ட தழும்பு அபிஷேகத்தின் போது இப்போதும் காணலாம். கோயில் மேற்கு பார்த்து அமைந்திருப்பதும், சிவனின் பீடம் சதுரமாக அமைந்திருப்பதும் மூர்த்தியும், தலமும் இங்கு சிறப்பு. அதே போல வடக்கு நோக்கி ஓடும் சண்முகாநதி தீர்த்தம் சிறப்பு. இந்நதியில் குளித்து சிவனை வழிபட்டால் ஏழேழு ஜென்ப பாவமும் விலகும் என புராணம் கூறுகிறது.

கைலாயத்தில் ஞானப்பழம் முருகனுக்கு கிடைக்காமல் விநாயகருக்கு கிடைத்து விடுகிறது. இதனால் கோபம் கொண்ட முருகன் பழனி மலைக்கு வந்து விடுகிறார். முருகனைத் தேடிக்கொண்டு சிவனும் சக்தியும் பூலோகத்தில் பழனி மலைக்கு அருகில் வந்து இறங்குகிறார்கள். அப்படி இறங்கிய இடத்தின் இயற்கை எழிலை கண்ட சிவன் அங்கேயே வீற்றிருந்து அருள்பாலிக்க நினைத்துவிட்டார். ஆனால் உமையவளோ தன் மகன் முருகனைக் காண பழனிக்கே செல்ல அனுமதிக்கும்படி சிவனிடம் வேண்ட சிவனும் சம்மதிக்கிறார். பிரிய மனமில்லாமல் நாயகி விடை பெற்றதால் அன்னை “பிரியா நாயகி” என்றும், விடை கொடுக்க மனமில்லாமல் சிவன் விடை கொடுத்ததால் “பிரியாவிடையார்” என்றும் அழைக்கப்பட்டார்கள். இதுவே காலப்போக்கில் மருவி “பெரியாவுடையார் பெரியநாயகி” ஆனது. பார்வதி முருகனைத் தேடி சென்று விட்டதால் இங்கு அம்மனுக்கென தனி சன்னதி எதுவும் கிடையாது. இருந்தாலும் சக்தி வேறு சிவம் வேறு என இல்லாமல் இரண்டும் ஒன்றானதால் இங்குள்ள சிவனை வழிபட்டாலே சிவசக்தியை வழிபட்ட பலன் கிடைக்கும். பழனி முருகனை தரிசிக்க வருபவர்கள், முருகனைத் தரிசிக்கும் முன் இங்குள்ள தீர்த்தத்தில் நீராடி, முருகனை தேடி வந்த தந்தையான பெரியாவுடையாரைத் தரிசனம் செய்த பின் பழனி முருகனைத் தரிசனம் செய்தால்தான் முழுப்பலன் கிடைக்கும் எனக் கூறுகிறார்கள்.

அருகிலுள்ள விமானதளம் : மதுரை

அருகிலுள்ள ரயில் நிலையம் : திண்டுக்கல்

பேருந்து வசதி : உண்டு

தங்கும் வசதி : இல்லை

உணவு வசதி : இல்லை