திருமுருகன் பூண்டி

                                                           திருமுருகன் பூண்டி , மாதவனேஸ்வரர் (கேது பரிகார தலம் )

திருத்தல அமைவிடம்: இந்தியாவின் தமிழ்நாடு மாநிலத்தின்  திருப்பூர் மாவட்டத்தின் அவிநாசியில் இருந்து தென்கிழக்கே 5 கி.மீ தொலைவில் நொய்யல் நதியின் வடக்கே அமைந்துள்ளது. திருப்பூர் ரயில்நிலையத்திலிருந்து 15 கி.மீ தொலைவில் உள்ளது. திருமுருகநாதர் கோயிலின் அருகிலேயே இக்கோயில் அமைந்துள்ளது. 

மாதவனேஸ்வரர் மூலவராக வீற்றிருக்கும் இவ்வாலய மரத்தடியில் நாகர்கள் சூழ, விநாயகர் சர்ப்ப விநாயகராக காட்சி தருகிறார். கருங்கல் ஸ்தூபி ஒன்று கொடிமரமாகக் காட்சி தருகிறது. வரவேற்பு வளைவைத் தாண்டி உள்ளே சென்றதும் மகா மண்டபத்தில் பெரிய கல் நந்தி வீற்றிருக்க, இருபுறமும் கணேசரும், பாலமுருகரும் தகப்பனுக்குத் துணையாக நிற்க, கருவறையில் மாதவனேஸ்வரர் என்ற திருநாமத்துடன் லிங்கத் திருமேனியாக இறைவன் காட்சி தருகிறார். தேவ கோட்டத்தில் தட்சணாமூர்த்தி தென்திசை நோக்கி அருள்பாலிக்கிறார். வடபுறம் துர்க்கையும், சண்டேசரும் எழுந்தருளியுள்ளனர். வெளிப்பிரகாரத்தில் கன்னி மூலை கணபதியும், வள்ளி தெய்வானை சமேத முருகனும் தனித்தனி சன்னிதிகளில் உள்ளனர். ஆலயத்தின் வடமேற்கு மூலையில் ஐந்து தலை நாகமும் மனித உடலுமாக கேது பகவான் தனிக் கோவில் கொண்டு விளங்குகிறார். இங்கே இவர்தான் சிறப்பு மூர்த்தி. ஒரு கோவிலில் ஒன்பது கிரகங்களும் இருக்கும் இடத்தினை ஆராய்ந்தால், கேது அங்கே வடமேற்கில்தான் வீற்றிருப்பார். அதேபோல இந்த ஆலயத்தின் வடமேற்கில் கேது சன்னிதி அமைந்திருப்பது மிகச் சிறப்பானதாகும். 

கோயிலுக்கு வெளியே தீப ஸ்தம்பம் காணப்படுகிறது. பொதுவாக கோயில்களில் நுழைவு வாயிலில் ராஜகோபுரம் அமைந்திருக்கும். ஆனால் இக்கோயிலில் நுழைவு வாயிலின் மேல் தளத்தல் பெரிய அளவில் நந்தியெம்பெருமான் ஈசனை நோக்கி வீற்றிருப்பதை காணலாம். மகா மண்டபத்தைக் கடந்து அர்த்த மண்டபத்தில் நுழைந்தால் தென்பகுதியில் விநாயகப் பெருமானும் வடபகுதியில் முருகப்பெருமானும் அற்புதமாக அருள்பாலிக்கின்றனர். கருவறையில் எழுந்தருளியிருக்கும் மாதவிவனேஸ்வரர் நாகாபரணத்துடன் அருளாட்சி புரியும் சுயம்பு மூர்த்தம். கருவறையின் பின்புறச் சுவரில் யானை ஒன்று தும்பிக்கையால் சிவலிங்கத்தைத் தூக்கிப் பிடித்திருப்பதை அழகிய புடைப்புச் சிற்பமாக வடித்துள்ளனர். கருவறை கோபுரம் நாகரம் என்னும் வகையைச் சார்ந்த சதுர வடிவ கோபுரம். கோபுரத்தின் ஒவ்வொரு பக்கத்திலும் இத்தலத்தின் சிறப்புகளை விளக்கும் விதமாக சுதைச் சிற்பங்களை மேல் ஒன்றும் கீழ் ஒன்றுமாக நேர்த்தியாக அமைத்திருக்கின்றனர்.

 

கோபுரத்தின் கிழக்குப் பக்கத்தில் முருகன் சிவபெருமானை வழிபடுதல் மற்றும் மகாரத பாண்டியன் பிள்ளைப் பேறு பெற்று இறைவனை வணங்குதல் ஆகிய காட்சிகள் உள்ளன. தெற்குப் பக்கத்தில் சிவபெருமான் சுந்தரமூர்த்தி சுவாமிகளை வேடுபறி செய்து அருளல் மற்றும் கேது பகவான் பூஜித்தல் காட்சி இடம் பெற்றுள்ளன. மேற்கு முகத்தில் சிவலிங்கத்திற்கு பசு பால் சொரிதல் மற்றும் பிரம்ம தாண்டவக் காட்சி உள்ளன. வடக்குப் பக்கத்தில் துர்வாச முனிவர் வழிபடல் மற்றும் மாலாதா வேடன் வழிபடும் சிற்பம் என நான்கு புறத்திலும் எட்டு நிகழ்வுகளை சுதைச் சிற்பமாக வடித்துள்ளது கோபுரத்துக்கு அழகு சேர்க்கும் விதமாக அமைந்துள்ளது. கோயில் ஒரு பிரகாரத்தைக் கொண்டது. முன் மண்டபத்தில் பைரவர் சன்னதியும், முன் மண்டபத்தை ஒட்டி தென் பகுதியில் துர்வாசர் தீர்த்தமும் உள்ளன. 

 

பிரதோஷம், சிவராத்திரி மற்றும் ஆருத்ரா தரிசனம் ஆகிய தினங்களில் விசேஷ அலங்காரத்தில் பூஜைகள் நடைபெற்று வருகிறது. கேது பகவானுக்கு ஞாயிற்றுக்கிழமைகளில் எமகண்டம், ராகு காலம் ஆகிய நேரத்தில் பூஜைகள் வெகு சிறப்பாக நடைபெறுகின்றன. கேதுதிசை, கேது புத்தி நடப்பவர்கள், ஜாதகத்தில் கேது தோஷம் உள்ளவர்கள், கொள்ளு தானியம் முடிச்சு போட்டு, பல வண்ண நிற திரி போட்டு, நெய் அல்லது நல்லெண்ணெய் தீபம் ஏற்றுகிறார்கள். கொள்ளு சாதம் நைவேத்தியமும் படைக்கிறார்கள். ஞாயிற்றுக்கிழமை காலை 11.00 மணிக்கு கேது பகவானுக்கு, சிறப்பு அபிஷேகமும் வழிபாடும் நடை பெறுகிறது. வேகவைத்த கொள்ளுப் பயறு மற்றும் ஏழு வண்ணத் துணிகள் ஆகியவற்றை இறைவனிடம் வைத்து பூசித்து, கேது பகவானை ஏழு முறை வலம் வந்து வணங்கினால், தோஷம் விரைவில் நீங்கும். பொருள்வசதி இருப்பின், ஐந்து கலசங்கள் வைத்து யாகம் வளர்த்து, துர்வாசர் தீர்த்தத்தில் நீராடி, இறை வனை வழிபடலாம். ஞாயிற்றுக்கிழமைகளில் மாலை 4.30 முதல் 6.00 மணி வரையிலும், திங்கட்கிழமைகளில் காலை 7.30 முதல் 9.00 மணி வரையிலும் ராகுகால சிறப்பு பூஜைகள் நடைபெறுகின்றன.

 

காலை 6.00 முதல் பகல் 1.00 மணி, மாலை 4.00 முதல் இரவு 8.00 மணி வரை திறந்திருக்கும்.

 

அருகிலுள்ள விமானதளம் : கோயம்புத்தூர் 

 

அருகிலுள்ள ரயில் நிலையம் : திருப்பூர்

 

பேருந்து வசதி : உண்டு

 

தங்கும் வசதி : இல்லை

 

உணவு வசதி : இல்லை