மேல் சேவூர்

இறைவி :  மங்களாம்பிகை

 

திருச்சிராப்பள்ளி மாவட்ட மணச்சநல்லூரில் வணிகர் குலத்தில் தோன்றியவர் வீரமலை சுவாமிகள் ஆவார். இளம் வயதிலேயே கல்வியும், அறிவும்  கொண்ட இவர் ஒரு கடையில் கணக்கராக வேலை பார்த்தார். வெள்ளி தோறும் திருவானைக்காவலில் உள்ள அகிலாண்டேஸ்வரியை வழிபட்டு வந்தார். வேலையை விட்டு உதறி, அம்மா மண்டபக் காவிரி நீரை மட்டுமே பருகி தவமிருந்தபோது, 12ம் நாள் அகிலாண்டேஸ்வரி அவர் முன்தோன்றி  மந்திர உபதேசம் செய்து அருளினாள் கி.பி.1870ம் ஆண்டில் முக்தியடைந்தார். அப்போது அடுத்த பிறவியில் மேல்சேவூர் நாராயணசாமி விஜயலட்சுமி  தம்பதியினரின் மகனாகப் பிறந்து அருள் வழங்கப் போவதாகக் கூறி மறைந்தார். அதன்படியே நாராயணசாமி நாயுடுவின் மகன் பாபு நாயுடுவாக தோன்றிய அவர், அருளாளராக வாழ்ந்து, சிவாலயத்தின் அருகேயே தந்தையும் தனயனும் ஜீவசமாதியானார்கள். இவர்கள் இன்றும் தமது அருளை வழங்கி வருகின்றனர். அடியார்களும் இவர்களுக்கு வழிபாடு மற்றும் குரு பூஜையை நிகழ்த்தி வருகின்றனர். ஆபத்தான ஆற்று வெள்ளத்தைத் தடுத்து ஊரைக் காத்த தலம் என்பதால் இத்தலம் மனிதர்களுக்கு ஏற்படும் ஆபத்தினைத் தடுக்கும் தலமாகத் திகழ்கின்றது.

 

 

மூன்று நிலை ராஜகோபுரம் ஐந்து கலசங்களுடனும் புராண, இதிகாச நிகழ்வுகள் சுதை வடிவ சிற்பங்களைக் கொண்டு கம்பீரமாக விளங்குகிறது. ராஜ கோபுரத்தின் உள்ளே நுழைந்ததும் வலதுபுறம் விநாயகர் சந்நதியும் இடதுபுறம் முருகப்பெருமான் சந்நதியும் அமைந்துள்ளன. வலமாக வந்தால் அன்னை மங்களாம்பிகையின் தனிச்சந்நதி தெற்கு நோக்கி அமைந்துள்ளது. மீண்டும் வலமாக வந்தால் கொடிமரம், பலிபீடம், நந்திதேவரைக் கடந்ததும் இறைவன் ரிஷபபுரீஸ்வரர் பிரகாசமாய் காட்சி தருகின்றார். கருவறை கோஷ்ட தெய்வங்களாக சிவ துர்க்கை, விஷ்ணு துர்க்கை, சோமாஸ்கந்தர், தட்சிணாமூர்த்தி, மகாவிஷ்ணு, சப்தமாதர்கள், ஈசானமூர்த்தி, தத் புருஷ மூர்த்தி, அகோர மூர்த்தி, சத்யோஜாத மூர்த்தி, ஸஹஸ்ர லிங்கம், காசி விஸ்வநாதர், வள்ளி தெய்வானையோடு விளங்கும் ஆறுமுகன், நடராஜர் சந்நதிகள் ஒருங்கே அமைந்துள்ளன. சந்தன மேடை, புஷ்ப மேடை, மடப்பள்ளி, நந்தவனம் முதலானவைகளும் ஆலய வளாகத்தில் அமைந்துள்ளன. கிழக்கு முகமாக சங்கராபரணி ஆற்றை நோக்கியவாறு இறைவன் ரிஷபபுரீஸ்வரர் அருள்கிறார். சுயம்பு லிங்கமாகத் தன் திருமேனியில் காளையின் குளம்பு வடுவுடன் காட்சி தருகின்றார். இதற்குச் சான்றாக இறைவனின் பெயர் தான்தோன்றி மகாதேவர் என கல்வெட்டுகளில் குறிப்பிடப்பட்டுள்ளது. இறைவன் சந்நதியின் இட துபுறம் தெற்கு முகமாக தனிச்சந்நதி கொண்டு அன்னை மங்களாம்பிகை காட்சி தருகின்றாள். நான்கு திருக்கரங்களுடன் அன்னை தாமரை பீடத்தில் நின்ற கோலமாக அருள் வழங்குகின்றாள்.