கூழைய கவுண்டபுதூர்

தல வரலாறு :  சுமார் 800 ஆண்டுகளுக்கு முன்பு வணிக குலத்தைச் சார்ந்த மாப்பிள்ளையும், மைத்துனரும் மதுரையிலிருந்து புறப்பட்டு அவினாசி, சேவூர் வழியாக மைசூருக்கு வியாபார விஷயமாக குதிரையில் செல்கின்றனர். இரவு நெருங்கி விட்டதாலும், கூடவே பயணக் களைப்பும் சேர மாப்பிள்ளையும், மைத்துனரும் கூழையகவுண்டன்புதூரில் தங்கி ஓய்வெடுக்கின்றனர். இதில் மாப்பிள்ளை அதீத சிவபக்தர். தினமும் சிவவழிபாடு செய்யாமல் எந்தச் செயலையும் துவங்க மாட்டார். இரவில் தங்கிவிட்டு மறுநாள் காலை இருவரும் நீராடிய பின்னர் மாப்பிள்ளையான சிவபக்தர், சிவ வழிபாடு செய்ய எண்ணினார்.

 

தனது மைத்துனரிடம் அருகில் சிவாலயம் ஏதேனும் உள்ளதா என பார்த்து வரச் சொல்கிறார். ஊர் முழுக்கத் தேடி சிவாலயம் இல்லாததை தனது மாப்பிள்ளையிடம் கூற எனக்கு ஏன் இந்தச் சோதனை என சிவபெருமானை தன் இதயத்தில் நிறுத்தி மனமுருக பிரார்த்திக்கிறார். அப்போது மைத்துனர் கவலைப்படாதீர்கள். இப்போதுதான் முனிவர் ஒருவர் சிவவழிபாடு செய்துவிட்டு போன இடத்தில் சிவலிங்கம் இருப்பதாகக் கூறி அழைத்துச் சென்றார். நிம்மதி அடைந்த மாப்பிள்ளை தனது மைத்துனர் அழைத்துச் சென்ற இடத்திலுள்ள சிவலிங்கத்தை வழிபட்டார். வழிபட்ட பின்னர் தன் சிவபக்த மாப்பிள்ளையிடம் நீங்கள் இன்று நன்றாக ஏமாந்தீர்கள்.

 

நான் தங்களுக்குத் தெரியாமல் குதிரைக்காக கொள்ளு வைத்திருந்த பையில் மணலை நிரப்பி, சிவலிங்கம்போல் தோற்றத்தை உருவாக்கி, மாலையிட்டு வைத்துவிட்டு தான், முனிவர் வழிபாடு செய்ததாக கூறி ஏமாற்றியதாக சொல்லி ஏளனமாக  மைத்துனர் சிரித்தார். அப்பாவியான மாப்பிள்ளை தனக்கு ஏன் இப்படி மீண்டும் மீண்டும் சோதனை என எண்ணி வேதனை அடைந்து கண்ணீர்விட்டார். சிவபெருமானை மனமுருக நினைத்து இன்று பூஜிக்க முடியவில்லையே இறைவா என்று உயிரை மாய்த்துக் கொள்ள முடிவெடுத்தார். அப்போது பக்தனின் பக்தியைக் கண்டு மெச்சிய சிவபெருமான் காட்சி தந்து நான் இங்கே லிங்க வடிவில் உள்ளேன். நீ கவலை கொள்ளாதே எனக் கூறி மறைந்தாராம். அதன் பின்னர் மணல் நிரப்பிய கோணிப்பையை எடுக்க மைத்துனர் முயன்றார். ஆனால், அதை அசைக்கக் கூட முடியவில்லை. அது நிஜ லிங்கமாகவே மாறியிருந்தது. பக்தனின் வேண்டுதலுக்காக சுயம்பு லிங்கமாக மாறிய சிவபெருமானின் அருள் மகிமையை உணர்ந்து மாப்பிள்ளை சிவபக்தர் ஆனந்தித்து பிரார்த்தனை செய்து மன நிம்மதியடைந்தார். இந்த அதிசயம் கண்டு தன் செய்கைக்கு வருந்திய மைத்துனர் மனம் திருந்தி தானும் சிவபக்தரானார். கொள்ளு வைக்கும் பைக்கு “மொக்கணி”என்று பெயர் உண்டு. ஆதலால் இறைவனின் திருநாமம் “மொக்கணீஸ்வரர்” என வழங்கப்பெற்றது. அதன் பின்னர் இருவரும் மைசூர் சென்று, வரும் வழியில் நடந்த இந்த இறை அனுபவத்தை மகாராஜாவிடம் கூற, அவர் இங்கு வந்து இறைவனை வழிபட்டு ஆலயம் எழுப்பியதாக கல்வெட்டுத் தகவல் கூறுகின்றது.

 

பிறரை அதீதமாய் நம்பி ஏமாந்தவர்கள், நம்பிக்கை துரோகத்திற்கு ஆளானவர்கள் இங்கு வந்து வேண்டி, மன அமைதி பெறுகிறார்கள். நம்பியவரால் ஏமாற்றமடைந்து, வஞ்சிக்கப்பட்டவர்களுக்கு இத்தல இறைவன் புது வாழ்வளிக்கிறார் என பக்தர்கள் சொல்லி சிலாகிக்கின்றனர்.  திருக்கார்த்திகை, கார்த்திகை சோமவாரம், சிவராத்திரி.