பூவரசன்குப்பம்

கோவில் அமைப்பு : இந்த கோயிலில் மூலஸ்தானம், அர்த்தமண்டபம், மஹா மண்டபம், சுற்று மதில்சுவர் ஆகியவற்றுடன் அமைக்கப்பட்டுள்ளது. இதில் மதிற் சுவர் தவிர்த்து அனைத்தும் கருங்கற்களாலே அமைக்கப்பட்டுள்ளது. ஸ்ரீபைரவர், நாகதேவதை, செந்தூரகணபதி, ராகு கேது பகவான் சன்னதி, நவகிரகங்கள் சன்னதி, சண்முகநாதர் சன்னதி ஆகியவை அமையப்பெற்றுள்ளது. கோயில் பிராகாரத்தில் நாகராஜர், சுப்பிரமணியர் சன்னதிகள் உள்ளன. ஊரின் ஈசான்ய மூலையில் இக்கோயில் உள்ளது. இத்திருக்கோயில் கும்பாபிஷேகம் 1964ம் ஆண்டு நடைபெற்றதாகவும், அதனைத்தொடர்ந்து 1999ம் ஆண்டு திருவாதிரை நட்சத்திரத்தில் நடைபெற்று, மூலவர் மற்றும் இதர சன்னதிகள் மறு வேலைப்பாடு செய்யப்பட்டு 2008ம் ஆண்டு கும்பாபிஷேகம் நடத்தப்பட்டதாகவும் ஊர் மக்கள் தெரிவிக்கின்றனர்.

 

வருடாந்திர திருவிழாக்கள் ஒவ்வொரு தமிழ்மாத கடைசி ஞாயிற்றுக்கிழமை ராகு கேது பரிகாரம், மஹா சண்டியாகம், லட்சார்ச்சனை நடைபெறுகின்றது.மகா சிவராத்திரியன்று அன்னாபிஷேகம், உத்திராயண புண்ணியகாலத்தில் தை மாதத்தில் ஆற்றுதிருவிழா தீர்த்தவாரி சுவாமி வீதி உலா நடைபெறுகின்றது. திருமணத்துக்காக காத்திருக்கும் பல வரன்களுக்கு நாகதோஷத்தால் திருமண தடைபடலாம். இதற்கு பரிகாரமாக திருநாகேஸ்வரம், கும்பகோணத்திற்கு அருகிலுள்ள கீழப்பெரும்பள்ளம், நாகர்கோவில், சங்கரன்கோவில் என பாம்புக்கோயில்கள் பல உள்ளன. இங்கு பாலாபிஷேகம் அல்லது நெய்தீபம் ஏற்றி வழிபட்டால் போதும். நாகதோஷம் போக்கும் மற்றொரு தலமான  பூவரசன்குப்பம் நாகேஸ்வரரை வழிபட்டாலும் தோஷம் நீங்கும். ராகு கேது பரிகாரத்தில் கலந்து கொண்டு பயன்பெற்றவர்கள் கோயிலுக்கு வந்து தங்களால் இயன்றதை செய்வதோடு, மற்றவர்களுக்கும் தோஷ நிவர்த்தி குறித்து கூறிவருகின்றனர். அதனால் இத்திருக்கோயில் ராகுகேது தோஷநிவர்த்தி தலமாக விளங்கி வருகின்றது.